Poultry farm sa barili gireklamo sa mga residente
CEBU, Philippines — Gimandoan sa lokal nga kagamhanan sa siyudad sa Barili ang usa ka poultry farm sa Barangay Tubod nga sulbaron ang fly infestation o pagdagsa sa langaw nga nakaapekto na sa komunidad.
Ang LGU nakadawat og reklamo gikan sa mga residente kalabot sa kadaghang langaw didto sa lugar hinungdan nga nipadala si Barili Mayor Pablo John 'John-John' Garcia IV og team nga gilangkuban sa municipal agriculturist, veterinarian, sanitary inspectors, ug representante sa environment and natural resources office pagsusi sa lugar.
Base sa ilang pakisusi nasuta nga ang pagdaghan sa langaw naggumikan sa kakuwang sa maintenance sa farm aron paghipos sa hugaw ug lakip na niini ang gubaon na nga protective net.
Nabalaka ang mga inspectors sa posibleng epekto niini sa panglawas sa mga residente kun dili kini mahatagan dayon og aksyon.
Kini ang hinungdan nga gihatagan og 48 oras ang poultry farm gikan sa pagdawat sa sulat gikan sa Mayor aron makahimo og solusyon. Ang tag-iya sa farm nisaad nuon sa mayor nga mokooperar pagsulbad sa maong issue.
"Giawhag namo ang tanan nga maglikay sa pag-atake o pag-post parte sa farm. Sila, sama nato, naga-pangandam sab aron matuman ang ilang responsibilidad sa Barili," matud ni Garcia. (BANAT NEWS)
- Latest
