Nadasmagan og bus patay: 300 ka disgrasya natala sa MITCOM

CEBU, Philippines — Usa patay sa nahitabong aksidente sa kadalanan diha sa Barangay Poblacion, Lungsod sa Compostela kagahapon sa hapon.

Ang biktima mao si Anthony Pino Genson, 23, residente sa Barangay Day-as, Lungsod sa Cordova.

Base sa taho sa Compostela Municipal Police Station nga motorsiklo, Ceres bus, utility crosswind ang nalambigit sa maong disgrasya.

Matud ni Police Captain Kelvin Roy Mamaradlo, hepe sa Compostela Municipal Police Station nga ang Ceres bus nga adunay plaka nga GXR-549 nga gimaneho ni Julian Baran Sontousidad, 39, molopyo sa Barangay Bagay, Lungsod sa Daanbantayan nagbiyahe paingon sa Cebu City.

Sa atubangan nga bahin niini anaa ang Suzuki Smash nga motorsiklo nga nagtangag sa plakang 070102 nga gimaneho sa biktima.

Giingong wala makabantay ang drayber sa Ceres bus nga mopaingong moliko sa wala ang biktima paingon sa usa ka beach resort hinungdan nga nabangga kini.

Ug sa ka kusog sa impact nalabay ang motorsiklo ug naigo niini ang utility crosswind ug laing motorsiklo nga nagbiyahe sa lahing direksiyon.

Dali nga gidala ang biktima diha sa Danao District Hospital apan gideklara kini sa doktor patay na nga naabot sa maong tambalanan.

Matud usab ni Mamaradlo nga nakaangkon og kadaot sa ulo ug ubang parte sa lawas ang biktima nga gituohang hinungdan sa kamatayon niini.

Nagtingkagol karon sa detention cell sa Compostela Municipal Police Station ang drayber sa Ceres bus.

Sa laing bahin, niabot na ngadto sa 300 ka disgrasya sa kadalanan ang natala sa Minglanilla Traffic Commission (MITCOM) sukad sa buwan sa Enero niining tuiga. Kini ang gibutyag ni Glenn Antigua, pangulo sa MITCOM.

Nasayran nga sulod sa 300 ka disgrasya190 niini ang adunay kalambigitan sa motorsiklo.

Si Antigua nipahimangno sa katawhan nga sa pagtapos sa long weekend angay nga mag-inampingon sa pag-uli o pagbiyahe paingon sa ilang mga trabahoan.

Iyahang gipanglantawan nga magdasok na usab unya ang mga sakyanan nga gikan sa habagatan. —Romeo D. Marantal, Gabriel C. Bonjoc (BANAT NEWS)