Panata, hugot nga debosyon nipatigbabaw sa Buhing Kalbaryo

CEBU, Philippines — Panata, mao ang nag-unang rason sa mga bitoon sa Buhing Kalbaryo nganong wa gyud sila niundang sa pagsalmot sa maong dula sa entablado sulod na sa taas nga katuigan.

Ang mga direktor niini nga sila si Mark Rosales, Henry Neal Chavez, ug Clefren Dumaguit mao ang mga karaang artista ug wala gyud sila nibiya niini gumikan kay nahimo na kini nga kabahin sa ilang kinabuhi sa pagtamod sa Semana Santa matag tuig. Atol sa presscon, gibutyag sa founder niini nga si Mayor Michael Rama nga ang Buhing Kalbaryo dili lang kutob sa dula sa entablado, kundi mao ang pagpatigbabaw sa hugot nga debosyon ingon man pagpalig-on sa espirituhanong aspeto sa Kristohanong kalibotan.

Ang nidala isip Hesus sa pagahimoon nga Stations of the Cross sa Buhing Kalbaryo nga si   John Michael “Angel” Calay nisaysay nga dili basta-basta ang gihimo nga preparasyon ilabi na nga kinahanglan nga makuha gyud niya ang insaktong emosyon sa iyang karakter.

Ang pagpasundayag sa Buhing Kalbaryo mahitabo karong Biyernes Santo, Abril 7,2023.  Gitawag usab kini og “Dula sa Pangamuyo” nga gilangkoban sa 130 ka mga artista nga pulos volunteers ug walay talent fee.

Ang dula magsugod sa Archdiocesan Shrine of San Nicolas de Tolentino ug mosubay kini paingon sa V. Rama hangtud sa Espina Compound sa Barangay Guadalupe. /MEL (BANAT NEWS)