Nangasaba sa usa ka environmental officer ikiha
CEBU, Philippines — Moduso og rekomendasyon ang Cebu City Environment and Natural Resources Office (CCENRO) ngadto sa Cebu City Legal Office aron pormal nga mapasakaan og kaso ang personnel sa usa ka kan-anan diha sa dalan Sanciangco nga giingong grabeng mikasaba ug mibalikas ingon man nanginsulto sa usa ka environmental officer.
Segun sa report nakahilak ang maong environmental officer nga usa ka senior citizen human siya gikasab-an og gitungo sa maong personnel dihang giisyohan og citation ticket ang maong kan-anan kay nigamit og plastic.
Gipatawag sa Kagamhanan sa Siyudad sa Sugbo sa niaging adlaw ang personnel sa kan-anan alang sa usa ka clarificatory hearing apan wala kini motunga.
Matud pa sa hepe sa CCENRO nga si Arlie Gesta nga igo ra nipatuman sa iyang trabaho ang environmental officer busa angayan kini nga respitohon ug dili angayan pakaulawan ug insultohon.
"Makadaghan na kaayo nga nahitabo nga pangasab-an o awayon og taman sa violators ang atong environmental officers. Pero kanang nahitabo sa kan-anan diha sa Sanciangco mao nay pinakagrabe. Senior na intawn ang environmental officer, pero gisiyagit-siyagitan," matud pa ni Gesta sa interview niini sa Banat News kagahapon.
Gipahinumdoman ni Gesta ang mga tag-iya og establisamento nga motuman sa mga lagda nga dunay kalabotan sa pagprotektar sa kalikopan kun dili kini gusto maisyohan og citation ticket.
"Kanang atong environmental officers, kanunay na sila nipatuman og maximum tolerance gitambagan na nato sila kanunay nga dili patolan kun pang-awayon sila. Apan dili na nato himoon rason nga pang-insultohon awayon sila, igo ra intawn na nanarbaho," dugang pa niya.
Isip pagtuman sa hustong proseso, ipatawag nila ang manghulga sa ilang staff alang sa usa ka clarificatory hearing aron kuhaan sa ilang habig. Sa higayon nga dili kini motunga, himoan dayon kini og rekomendasyon alang sa pagpasaka og tukmang kaso. Sa nasayran nahimong trending sa social media sulod sa pipila ka adlaw ang maong panghitabo. (BANAT NEWS)
- Latest
