Pagmina og dolomite nagpadayon, gobernador miisyu og laing EO

CEBU, Philippines —  Gisubli ni Gobernador Gwendolyn Garcia ang iyang kamandoan sa Philippine Mining Services Corporation (PMSC) nga hunongon ang pagproseso, pagbaligya ug pag-transport og dolomite, associated mineral deposits ug ubang quarry resources.  Kini human nga wala matuman sa PMSC ang unang kamandoan sa gobernadora niadtong 2020 pagpahunong sa ilang pagproseso ug baligya og minerals tungod kay nakalapas kini isa local tax laws ug ubang regulasyon sama sa environmental laws.

Niadtong Oktubre 7, 2020 ang gobernador niluwat og Executive Order No. 2-B pagpahunong sa maong kompaniya nga pagproseso og minerales diha sa lungsod sa Alcoy.

“In defiance of Executive Order No. 25-B, Series of 2020, two million five hundred fifty-three thousand two hundred ninety-nine (2, 553, 299) metric tons of mineral resources were extracted by Dolomite Mining Corporation (DMC) from September 2020 to December 2022 and sold to PMSC per data duly received by the Mines and Geosciences Bureau (MGB) from DMC,” pagbasa sa EO No. 7 series of 2023 ni Garcia nga giluwatan niadtong Pebrero 17,2023.

Sumala pa sa gobernadora sa iyang EO bisan sa pila ka notisya nga gipadala nila ngadto sa PMSC nga nag-require sa bayranan niini, pakyas  gihapon ang maong kompaniya sa ilang taxes ngadto sa Kapitolyo.

Kini ang hinungdan nga nimando balik si Garcia sa ipahunong ang pagpaproseso, baligya ug transport sa PMSC sa dolomite ug ubang minerales.

Gimandoan sab sa gobernador ang MGBP nga dili na moluwat pa og Mineral Ore Export Permits (MOEP) ug Mineral Ore Transport Permits (MOPT) ngadto sa PMSC ug ikanselar ang kasamtangang MOEP ug MOPT nga unang giluwat sa ahensya ngadto sa maong kompaniya.

Gipirmahan ni Garcia ang iyang EO atubangan sa mga opsiyal sa PNP ug sa Philippine Coast Guard (PCG) nga iyang gimandoan nga siguraduhon nga walay barkong makabiya gikan sa pantalan sa PMSC kun walay igong dokumento lakip na ang MOEP ug MOPT hangtod nga dili niya libkason ang EO. (BANAT NEWS)