Congressional inquiry himuon nunot sa power crisis sa Mactan

CEBU, Philippines — Usa ka congressional inquiry ang gipaabot nga himuon aron sa pagkuha og katin-awan labot sa power crisis karon nga giatubang sa mga Oponganon.

Si Kongresista Cindi King-Chan miingon nga makigtagbo siya sa kadagkoan sa mga ahensiya sa kagamhanan nga naglambigit niini nga naglakip sa Department of Public Works and Highways,  (DPWH) National Grid Corporation of the Philippines (NGCP) ug Mactan Electric Company (MECO) nga gikatakda sa  Pebrero 13, 2023.

Sa nasayran nga nakasinati karon og power crisis ang siyudad ug Lungsod sa Cordova tungod sa pagkaputol sa transmission line sa NGCP nga nag-supply og kuryente sa MECO.

Ang hinungdan tungod sa giugmad nga underpass sa DPWH sa UN Avenue sa Siyudad sa Mandaue nga aksidenteng naigo sa pagkubkob sa ilang gikuhang kontraktor niadtong Enero 21, 2023

Gumikan sa pagkaputol kuwang ang supply sa kuryente sa Mactan hinungdan sa rotational brownouts sa kabarangayan.

Si Gilbert Pagobo, executive president sa MECO miingon nga gawas sa rotational brownouts mosaka sab ang balayranan sa kuryente gikan sa P15 ngadto sa P20 matag kilowatt hour.

Gikasagmuyo kini ni Mayor Junard “Ahong” Chan kinsa mibahad nga mopasaka og kaso batok sa DPWH. (BANATNEWS)