Tinguha ni Chan nga representasyon sa MCIAA board suportado ni Garcia
CEBU, Philippines — Nakuha ni Lapu-Lapu City Mayor Junard “Ahong” ang suporta ni Goberandor Gwendolyn Garcia sa tinguha niini nga makakuha og representasyon ang Lapu-Lapu sa Mactan-Cebu International Airport Authority (MCIAA) Board.
Si Garcia kinsa membro sa MCIAA board nagtoo nga angayan ra nga adunay representante ang syudad sa board hilabina sa Mactan Cebu International Airport (MCIA) anaa nahimutang sa Lapu-Lapu City.
“It is only right and just. Naa gud na sa Lapu-Lapu ang airport, naa gyu’ng mayor diha molingkod,” matud ni Garcia.
Si Chan uban sa iyang asawa nga si Lapu-Lapu City Lone District Representative Ma. Cynthia “Cindi” Chan mibisita sa gobernador niadtong Pebrero 1 aron ipadangat ang sentimento niini.
Gipaabot nga dad-on ni Garcia ang sentimento ni Chan ngadto sa board of directors sa MCIAA atol sa sunod nila nga tigom sunod bulan.
Si Garcia nagkanayon nga bisan ang iyang amahan nga si anhing gobernador ug Deputy Speaker Pablo Garcia gusto gyud nga mahatagan og position ang Lapu-Lapu sa MCIAA Board.
Ang MCIAA gihimo sa Kongreso pinaagi sa Republic Act No. 6958 nga maoy modumala ug supervise sa Mactan Cebu International Airport niadtong July 31, 1990. — /IBM (BANAT NEWS)
- Latest
