PMS nipasalig nga mosuporta sa tinguha ni Rama

CEBU, Philippines — Gipasalig sa bag-ong gitudlo nga Presidential Management Staff (PMS) head for the Visayas Mark Gimenez kang Mayor Michael Rama nga suportahan niini ang iyang tinguha nga "Singapore-like" Cebu City.

Base sa report sa Cebu City Public Information Office si Gimenez ni-courtesy call sa niaging adlaw kang Rama ug gipaambit niini ang iyahang plano alang sa Singapore-like Cebu City ingon man ang ubang proyekto nga makatabang aron makab-ot ang maong tinguha.

Matud ni Rama nga gusto niini nga motukod og dugang medium-rise buildings (MRBs) aron pag-akumodar sa informal settlers nga maapektohan sa restoration sa mga kasapaan sa siyudad.

Si Rama nagkanayon nga aron matuman ang maong mga proyekto ang iyahang administrasyon magkinahanglan og P145 bilyones ug nagsalig kini sa Public-Private Partnerships (PPP) aron mapundohan.

Gusto ni Rama nga mahimo ang mga proyekto sa tulo ka tuig niya nga termino hinungdan nga nibutyag siya kang Gimenez nga gikinahanglan niya ang tanang suporta apil na kang Presidente Ferdinand "Bongbong" Marcos, Jr..

Si Gimenez gitudlo ni Marcos isip bag-ong pangulo sa PMS for the Visayas niadtong Septiyembre 12, 2022.

Ang trabaho niini mao ang pag-manage sa development ug formulation sa projects ug policies ug mo-monitor sa national programs ug mga proyekto sa Visayas. Isip presidente usab sa League of Cities of the Philippines gusto ni Rama nga ma-extend ang relasyon niini kang Gimenez ngadto sa mga miyembro sa LCP. —BDB (BANATNEWS)