Libreng wifi ilusad na sa siyudad sa Sugbo karong buwana

CEBU, Philippines — Mosikad na atol sa birthday ni Mayor Michael Rama karong Oktubre 28, 2022 ang paglusad sa unang hugna sa public wifi sa dakbayan sa Sugbo.

Sa unang bahin niini, moabot ngadto sa unang pito ka barangay ang makatagamtam og libreng wifi.

Base sa impormasyon sa Cebu City Public Information Office,  nagkasinabot ang Management Information and Computer Services (MICS) ug ang usa ka  internet service provider  nga ang pilot areas sa maong programa naglangkob sa Barangay Basak San Nicolas, Ermita, Kamagayan, Lorega-San Miguel, Mambaling, Sto. Nino, ug Tisa.

Nipasalig ang Kagamhanan sa Siyudad sa Sugbo nga dili ra angayan maguol ang nahibiling 73 ka barangay, sanglit naa gyud sa direksyon nila ni Mayor Michael Rama ug Bise Mayor Raymond Garcia nga mabutangan og public wifi ang tanang 80 ka mga barangay.

Niadtong 2021, ang Cebu City Council nipasar og ordinansa nga magtukod og barangay internet access points sulod sa dakbayan.

Ang ordinansa nga gimugna ni kanhi konsehal ug karon South District Rep. Eduardo “Edu” Rama, Jr., ug nag-ulohan kini og “Barangay Internet Access Points Ordinance.”

Pipila sa mga lugar nga gitun-an nga adto ipahimutang ang public wifi mao ang barangay hall, sports complex, fire stations, public market ug uban pa.

Tumong niini nga makakonektar ang mga tawo og sayon nga access sa impormasyon ug mga serbisyo nga gipaagi diha sa internet.

Makaabag usab kini sa mga tawo nga mag-research alang sa nagkadaiyang impormasyon ug nahaom usab kini sa panahon diin online sa ilang pag-eskwela ang mga tinun-an.

Una na nga gibutyag sa kongresista nga sa wala pa napasar ang maong ordinansa nihimo na usab siya og pilot sa maong serbisyo ngadto sa 20 ka barangay gamit ang iyang personal nga pundo. —MEL (BANATNEWS)