Pagbisita sa Balay Silangan sa La Union makatabang sa CLOSAP

CEBU, Philippines — Ang mga sakop sa City of Lapu-Lapu Office for Substance Abuse Prevention (CLOSAP)-nibisita sa Municipality of Bangar, La Union aron mokat-on sa mga best practices sa ilang drug rehabilitation program.

Ang grupo nga gipadala ni Mayor Junard "Ahong" Chan nibisita sa Bangars Balay Silangan "Reformation Center" usa ka community-based reformation program nga nagtinguha nga mo rehabilitate sa mga tawo nga tiggamitan ug ginadili nga drugas.

Ang CLOSAP gihatagan ug higayon nga makiglambigit sa Balay Silangan workers ug beneficiaries, diin lakip sa gitutokan nila ang values formation ug integrity sessions.

Ang Balay Silangan, usa ka national drug reformation program nga gi establisar sa Philippine Drug Enforcement Agency (PDEA) ug gipatuman sa PNP ug sa lokal nga kagamhanan, isip temporaryo nga estaran sa mga drug offenders nga nagtinguha nga mag usab sa ilang kinabuhi.

Suma pa ni Garry Lao ang pangulo sa CLOSAP nga tinguha usab sa Lapu-lapu City nga mobukas ug susama nga center karong tuiga.

Daku usab nga tabang kanila ang gihimong immersion aron masuta kun giunsa ang pagpadagan sa Balay Silangan, ug tinguha nilang himoon kini sa Dakbayan sa Lapulapu.

Gitug-an ni Lao, nga importante usab nga ang local government andam mosuporta sa mga drug offenders ug mosulbad sa problema sa illegal nga drugas.

Mapasalamaton si Lao, kang Mayor Joy Pinzon Merin ug Balay Silangan personnel sa pagdawat kanila ug sa kalampusan sa maong facility. —MEL (BANATNEWS)