IBP uban sa NCIP motanyag og mga serbisyo sa ATi IP community

CEBU, Philippines — Pipila ka mga programa ug serbisyo ang ipahigayon sa Integrated Bar of the Philippines (IBP) uban sa National Commission on Indigenous People (NCIP)–Cebu Province diha sa Siyudad sa Naga.

Ang maong programa langkuban sa legal aid ug uban pa nga outreach programs alang sa mga Ati IP community diha sa Sitio Buyo, Barangay South Poblacion, Siyudad sa Naga karong Mayo 14, 2022.

Ang mga serbisyo nga itanyag ngadto sa IP community sa maong lugar mao ang Philsys national ID registration; libre nga vaccination ug pag-apod-apod og school supplies ngadto sa mga Ati learner sa kinder ug elementarya alang sa pagpangandam sa face-to-face classes ug libre nga medical consultation lakip na ang medical services.

Iapod-apod usab sa maong adlawa ang mga gidonar nga libro, portable sound system, construction materials ug mga pintal alang sa pag-ayo ug renovation sa Ati Tribal Hall.

Nasayran nga adunay ipahigayon usab nga community pantry ug fellowship.

Ug kon matapos na ang phase 1 sa maong programa sundan usab kini sa phase 2 ug phase 3 alang sa capacity  building ug education assistance diin naapil dinhi ang  learner ship training, back-to-school assistance, scholarship, food education and fortification ug livelihood programs. (BANAT NEWS)