Linya sa komunikasyon sa kabarangayan pakusgan sa CCDRRMC
CEBU, Philippines — Ang pagpakusog sa koneksyon sa komunikasyon sa kabarangayan maoy usa sa gitinguha karon sa Cebu City Disaster Risk Reduction and Management Council (CCDRRMC).
Suma pa sa chairman sa CCDRRMC nga si Atty. Gerry Carillo nga dako kaayo og tabang ang maong butang ilabi na panahon sa emerhensya.
Sa pagamit sa mga bag-ong teknolohiya, dali usab nga mapadala sa CCDRRMC ang ilang mensahe ngadto sa ubang responders sa kabarangayan.
Atol sa media forum nga gi-organisar sa Cebu City Public Information Office, gibutyag ni Carrillo nga ang maong pamaagi tawagon niya og “11G”
Mao kini matud pa ang magsilbing haligi sa ilang radio communication ug internet connection sa tanang 80 ka barangay sa dakbayan.
Tipik na usab kini sa pag-umol og kahimanan alang sa usa ka early warning system.
Matud pa niya nga mapaspasan na unya ang pagtubag sa mga alarma.
Gani sa umaabot nga mga adlaw duna silay pasiuna nga ilusad nga TV system ngadto sa 30 ka sites ug gikatakda kini nga makompleto sunod buwan sa 80 ka mga barangay. Sa maong sistema direkta usab nga makahatag og mensahe o anunsyo si Mayor Michael Rama ngadto sa kabarangayan pinaagi sa data connection.
Magamit usab kini kun dunay importanteng pahibalo ang kagamhanan ngadto sa katawhan. —MEL (BANATNEWS)
- Latest
