Mayor Flores nagtuo nga napolitika sa iyang tinguha pagtukod og merkado
CEBU, Philippines — Mayor Julie Flores sa Lungsod sa Barili nagtuo nga gipamolitika siya human wala pa gihapon matuki ug maaprobahi ang iyang giduso nga ordinansa nga nagtinguha sa pagtukod ug moderno nga merkado publiko sa lungsod nga nagkantidad og P200 milyones.
Matud pa ni Flores, nga grabeng kadaut ang naangkon sa ilang merkado human sa pagkuso-kuso sa bagyong Odette.
Gidugang sa mayor nga nagpaabot nalang sila sa Sangguniang Panlalawigan sa ilang pag review sa maong aprobado nga SB ordinance nga nagtugot kanila sa pag loan alang sa katukoran sa maong proyekto apan hangtud karon wala pa kini matuki o ma agenda sa Committee on ways and means.
Sumala pa ni Flores, niadtong November 8, 2021 niduso sila sa ilang SB Ordinance nga nag aprobar sa pag avail sa loan, ug gi forward kini sa sangguniang panlalawigan for review sa November 11, 2021.
Ang SP niduso sa maong ordinance niadtong November 22 sa ways and means, ug niadtong December 6, ang committee on ways and means nangayo ug dugang dokumento sa LGU sa Barili ug nahatag usab dayon kini sa komite.
Matud sa mayor nga hangtud karon daw gilangay-langay sa SP ang proyekto ug siya nagtuo nga daw gisakyan ug politika ilabi na iyang makaatbang ang mga Garcia.
Si Flores, nitug-an nga iyaha nang gitawgan ang Chairman sa Ways and Means apan wala pa gihapon kini makahatag ug tubag human kini niingon nga mopatawag pa sa iyang komitiba.
Gisuwayan sa pagpada og mensahe pinaagi sa text si Board Member Horacio “Raci” Franco, Chairman sa Committee on ways and means alang sa iyang panahom apan wala pa kini mohatag ug komento. MEL (BANATNEWS)
- Latest
