Training alang sa teknolohiya giduso sa konseho sa siyudad

Cebu, Philippines — Nipasar ang konseho sa Dakbayan sa Sugbo og resolusyon nga maghatag og lapad nga training sa mga Sugbuanon nga magsilbing instrumento alang sa dakong kahigayonan sa pagbaton og trabaho nga nagkinahanglan og dakong katakus sa teknolohiya.

Suma pa ni Konsehal Alvin Dizon kinsa maoy author sa maong resolusyon nga dili na gyud kapugngan ang pag-usbong og maayo  sa digital world ug usa kini sa nahimong luna sa pipila ka klase sa trabaho.

Gawas sa mga call center ug mga Online English Teaching, nagbaha na gyud karong panahona ang nagkadaiyang trabaho nga kinahanglan mogamit og teknolohiya.

Ang Department of Manpower Development and Placement (DMDP) mao ang gitugyanan nga mogama og dugang kurso alang sa lapad nga training aron makaapas kini sa demand sa trabaho nga dunay dakong presensya sa teknolohiya. Gipaabot usab nga mohimo og nagkdaiyang joint venture ang kagamhanan ngadto sa mga pribadong kompaniya alang sa pagpalapad pa sa maong katuyoan.

Suma pa ni Dizon nga ubay-ubay gyud ang nawad-an og trabaho tungod sa pandemya busa gamit kaayo ang mga training nga maghatag og dakung kahigayonan alang sa panarbaho. ( BANAT NEWS)