‘Spaghetti wires’ sa siyudad gihapsay

CEBU, Philippines — Gipadayon kagahapon sa kagamhanan sa Dakbayan sa Sugbo ang pag-atiman sa mga gubot ug naglambod nga kable sa mga poste nga hugaw kaayong tan-awon. Gilusad kagahapon sa siyudad ang “spaghetti wires eradication program”. Matud ni Konsehal Jerry Guardo, chairman sa technical infrastructure committee, nga gi-regroup ang telecommunication companies aron paglimpyo sa gubot nga mga kable. Gihulagway ni Guardo nga 60 porsyento sa mga wires sa Siyudad sa Sugbo mga “dead wires” or wala nay gamit hinungdan nga tangtangon kini, limpyuhan ug bugkoson.

Sa ilang kalihukan kagahapon, kun duna silay makit-an nga poste nga gabok, ipatangtang kini ug hulipan og konkreto nga poste.

Ang Parks and Playground Commission maoy molimpyo sa mga wires nga nilambod sa mga kahoy ug ang Department of Public Services ang moilis sa mga suga nga guba na.

“So overall ang atoang picture nga gusto ma-achieve diri ang cleansing program gyud, malimpyo atong mga wires, nawa hugaw kaayo, gubot kaayo, at least karon makita nga usa nalang nagawas, bundle na, limpyo na kaayo tan-awon,” matud ni Guardo.

Gihulagway sa konsehal nga usa kini ka city-wide program ug giuna lang nila ang Urgello Street kay nakita nila nga usa kini sa labing daghan og gubot nga wires. Giklaro ni Guardo nga wala’y gasto ang siyudad sa paghimo niini ug ang ila lang mao ang pagkuha sa kooperasyon sa mga telecommunication companies. /GMR (BANATNEWS)