Labella, kaubanan gikiha ni Osmeña

CEBU, Philippines – Gikiha ni Cebu City mayor Tomas Osmeña si Mayor Edgardo Labella ug City Legal Officer Rey Gealon, ug City Administrator Floro Casas Jr., kini kalabot sa pagdumili nila nga ibalik sa orihinal nga estado ang naguba nga Mayor’s Office.

Ang kanhi mayor ni-file og kasong kalapasan sa section 3 (e) sa Anti-Graft and Corrupt Practices Act, grave misconduct ug conduct unbecoming of official batok ni tulo ka mga opisyal sa dakbayan sa Sugbo.

Apil usab nga gipasakang reklamo ni Osmeña mao ang usurpation of public functions ubos sa Revised Penal Code batok kang Gealon ug Casas.

Si Osmeña nipasangil kang Labella ug sa mga kaubanan niini nga gituyo nila nga dili humanon ang pagbalik sa karaan nga “state” o kondisyon sa Mayor’s Office, hinungdan nga nakahatag kini og “injury” sa gobiyerno.

Sa wala pa ang iyang paglingkod sa katungdanan niadtong 2016 si Osmeña nihangyo sa konseho nga mogahin og P2 milyones nga pundo alang sa renovation maong opisina nga iyang gamiton, apan gibasura kini sa Sangguniang Panlungsod hinungdan nga napugos si Osmeña nga mogamit sa iyang personal nga kwarta aron nga ayuhon ang nahisgotang buhatan.

Apan sa dihang napildi siya ni Labella niadtong niaging eleksyon, gipatangtang ni Osmeña ang tanan niyang gamit nga gibutang sa maong opisina sa dili pa mahuman ang iyang termino niadtong Hunyo 30, 2019.

Apan sa paghimo niini, naguba ang maong opisina ug wala ibalik sa orihinal nga estado niini maong nipasaka og kaso ang siyudad batok sa kanhi mayor ug sa 44 ka mga tawong maoy niguba sa maong buhatan. (/IBM)(BANAT NEWS)