PNP niapelar ipakuha ang patay’ng lawas ni Sabalones

CEBU, Philippines – Ang kapolisan niapelar karon sa pamilya sa self-confessed drug lord nga si Franz Sabalones nga mopatim-aw aron makahatag kini og kompirmasyon nga ang namatay mao si Sabalones.

Si Brigadier General Debold Sinas, direktor sa Police Regional Office (PRO)-7 nagkanayon nga nangita sila sa mga pamilya ni Sabalones diha sa mga kanhi gipuy-an niini apan wala na kini sa Sugbo.

Matud ni Sinas nga natingala usab sila nga wala pay pamilya ni Sabalones ang nipatim-aw bisan ang inahan niini.

Ang inahan maoy unang masakitan sa higayon nga adunay mamatay o mahitabong aksidente nga sakop sa iyang banay.

Si Sinas niapelar sa mga tagtungod o pamilya ni Sabalones nga mopatim-aw alang sa ilang humanitarian ug civic side aron makuhaan og mga impormasyon.

Tumong usab niini nga masusi ang patay’ng lawas ug makonpirmar sa pamilya nga ang namatay mao gyud si Sabalones tungod kay kinahanglan ang scientific nga pruweba aron malikayan ang mga katahap.

Si Sinas nagtuo nga wala na sa Sugbo ang pamilya ni Sabalones.

Ang patay’ng lawas ni Sabalones atoa pa sa usa sa mga punerarya sa kaulohan ug dili kini malubong hangtud nga wala pay mo-claim niini nga pamilya ug adunay pipila ka bulan nga tagal una ilubong sa punerarya ang patay’ng lawas.

Niadtong Huwebes Santo si Sabalones ang namatay human kini pusila sa wala mailhing kriminal didto sa Quezon City. (/BDB)(BANAT NEWS)