Nasagulan na og politika ang pagtuki sa resource center?

CEBU, Philippines – Mas nalangay pa ang pag-aprubar sa resolusyon paghatag og authority ni Gobernador Hilario Davide III nga mosulod og kontrata tali sa kontraktor nga motukod sa 20-storey building sa Capitol compound.

Gumikan kini kay wala magka-quorum ang Provincial Board atol sa special session nga gipahigayon kagahapon.

Siyam ra ka bokal ang mitambong sa session ug gikinahanglan unta nga dili momenus 10 ka board members ang angay makatambong aron ma-quorum apil ang bise gobernador nga maoy presiding officer.

Ang mitambong mao sila bokal Celestino Martinez III, Jerome Librando, Raul Bacaltos, Miguel Magpale Earl Tidy Oyas, Jose Mari Salvador, Jerico Rubio, Jude Thaddeos Sybico ug Bise Gobernador Agnes Magpale.

Ang ubang bokal nga wala, mao ang kasagaran nga wala moboto ug mi-abstain sa pagboto alang sa pag-approve sa authority kang Davide atol sa miaging session niadtong Lunes.

Si Magpale nasagmuyo sa nahitabo sanglit buot niya nga matapos ang tanang wala mahuman nga trabaho sa PB sa dili pa matapos ang tuig. Nasayran nga mobalik sila og session karong Enero 21, 2019.

Matud ni Magpale nga mao kini ang unang higayon nga aduna silay “unfinished business”.

Nagduda karon si Magpale nga nasagulan na og politika ang pagtuki sa resource center sa Kapitolyo.

“Of course ma-politicize man gud ang issue tingale... I have my suspicions but dili man ta ka confirm until nakadungog ta unsay instructions” matud ni Magpale. (/DILT)(BANAT NEWS)