Garcia namolitika bahin sa resource center?

CEBU, Philippines — Gihulagway sa mga opisyal sa Kapitolyo nga pamolitika ang padayon nga pagkwestyon ni Kongresista Gwendolyn Garcia sa plano sa pagtukod sa 20-storey resource center.

Kini human nga si Garcia mipadala og sulat ngadto kang Bise Gobernador Agnes Magpale ug sa mga bokal nga nagpahimangno kabahin sa  pagtukod sa P1.3 billion nga resource center bisan og walay approval gikan sa National Historical Commission of the Philippines (NHCP).

Gihulagway ni Garcia nga “illegal scheme” ang pagpatukod sa administrasyon ni Davide sa maong edipisyo nga karon anaa na sa lamisa sa Provincial Board ug hapit na matuki.

Si Davide nagkanayon nga hagbay ra nilang gitubag ang kabalaka sa NHCP ug ang gihimo karon ni Garcia usa ka matang sa pamolitika.

“Mao ba na ang iyang gibuhat before? Nga nidiritso man to siya, walay konsulta-konsulta sa provincial board” matud sa gobernador.  Si Garcia, modagan pagka gobernador sa lalawigan karong May 2019 midterm election.

Iyang makaatbang si Bise Gobernador Magpale kinsa miingon nga namolitika si Garcia sa maong proyekto ug wala siyay plano nga tubagon ang sulat sa kongresista.

“It’s dictating to the legislative department? Because look at the tenor ha (sa sulat)” matud ni Magpale.

Dugang niini nga ang pagpangayo sa executive department og pagtugot sa PB nga ipadayon ang maong proyekto, moagi pa kini og pagtuki.

Diin mahimo nilang mapatawag ang mga tawo nga adunay kalambigitan sa maong proyekto sama nila ni Atty. Mark Tolentino, ang provincial administrator, Atty. Orvi Ortega ang provincial legal officer ug uban pang abogado nga mahimong makatubag sa mga pangutana sa mga bokal.

Si Garcia nagkanayon nga lahi ang politika ug ang kalapasan sa heritage law ug anti-graft law.

“As for me, rushing through this project just a few months before the May 2019 elections suspiciously smacks of politicizing” pamahayag ni Garcia. (/DILT)(BANATNEWS)