“Opaw” gidakop kay namaligya og drugas

CEBU, Philippines — Lalaki nga namaligya og ilegal nga drugas ang gidakop sa kapolisan sa Dakbayan sa Talisay sa may Barangay Candulawan kagahapon sa kadlawon.

Ang nasikop mao si Joradin Diaz alyas Opaw, 29-anyos, ulitawo nga nagpuyo sa maong dapit.

Si Police Supt. Marlu Conag, hepe sa kapolisan sa Talisay City Police Station miingon nga milutaw ang pangalan ni alyas Opaw hinungdan nga ila kining gisusi.

Gani sa gipahigayon nila nga buy-bust operation, giingong plastada kaayo ang pagpamaligya niini.

Wala maglisud ang mga operatiba sa pagsikop ni Opaw kinsa nakuhaan og napulo ka gagmay nga pakete sa gituohang shabu. Gidala sa Talisay City Police Station ang dinakpan ug gitanggong sa bilangguan.

Gikatakda kining pasakaan og kaso ugmang adlawa. (/DILT)(BANATNEWS)