Mga residente sa Lagtang namauli bisan og delikado

CEBU, Philippines — Bisan og delikado ang ilang sitwasyon tungod kay posibleng adunay mahitabong dahili sa yuta sa ilang lugar apan namalik sa ilang mga pinuy-anan ang mga residente sa Sitio Tuigib, Barangay Lagtang, Dakbayan sa Talisay.

Imbes nga magpabilin sila diha sa Tabunok Sports Complex apan kadaghanan kanila ang nibalik sa ilang panimalay tungod kay giingong nangasakit na ang maong mga residente.

Si Nora Bacalso, usa sa mga apektadong residente nagkanayon nga 63 ka pamilya ang naapektohan nga nanghikling niadtong Oktubre 2 niining tuiga apan karon 15 na lang sila ka pamilya ang nahabilin.

Matud ni Bacalso nga nakabaton sila og kalibog kong mobalik ba sila sa ilang pinuy-anan o mopabilin diha sa sports complex tungod kay nabalaka usab sila sa disgrasya.

Samtang si Willy Abatayo, supervisor sa QM Builders nipasalig og relocation site alang sa mga apektadong pamilya apan sa pagsusi sa  city engineering ug Provincial Environment and Natural Resources (PENRO) wala makapasar ang lugar nga mahimong relocation site.

Si Abatayo giingong nipasalig usab kini nga andam silang makigsabot sa mga apektadong residente.

Ang dakbayan sa Talisay giingong walay mahatag nga relocation site alang sa mga nahisgutang residente.

Kini maoy gibutyag ni Atty. Rudelyn Navarro, city administrator niining ulahi lang. Si Kapitan Chester Salcedo sa Lagtang nagkanayon nga dako og problema ang mga residente sa lugar ilabi na kabahin sa panglawas tungod kay lisod ang ilang sitwasyon diha sa sports complex.

Sa nasayran, dako na ang lahap sa bukid  diha sa Lagtang dihang gihimo ang inspeksiyon sa lugar nga maoy gikabalak-an sa mga residente nga posibleng modahili. (BANAT NEWS)