11 mil tinun-an sa Naga wa kaeskuyla
CEBU, Philippines — Dili momenus 11 mil ka mga tinun-an sa Dakbayan sa Naga ang apektado sa nahitabong pagdahili sa yuta sa Barangay Tinaan sa maong dakbayan.
Matud ni Gregorio Cyrus Elejorde ang Naga City Schools Division Superintendent 1,768 ka mga tinun-an sa upat ka mga eskuylahan ang wala makasud sa klase tungod sa pagdahili sa yuta.
Ang mga tinun-an sa Cepoc Central School; Tinaan National High School; Mainit National High School ug Mainit Elementary School ang wala na paklasehe tungod kay anaa kini sa “one kilometer radius” nga gideklarar sa Department of Environment and Natural Resources (DENR) nga “no safe zone.”
Dili momenus 10,466 usab ka mga tinun-an sa lima ka mga tunghaan sa dakbayan ang naapektohan ang klase kay gigamit nga evacuation center ang ilang mga lawak saringan.
Ang naapektohan ang klase mao ang Naga National High School, Naga Central Elementary School, Naalad Elementary School; Langtad Elementary School ug NTC Colon Elementary School. Matud ni Elejorde nga ang kapin usa ka libo nga mga tinun-an ug bakwit nga anaa sa mga tunghaan gipaubos pa og psychosocial intervention ug human niana, mobalik sila sa klase ngadto na sa eskuylahan kon asa sila nibakwit.
Pananglitan ang mga bakwit nga tinun-an sa high school nga anaa sa Naga Central Elementary School, adto na sila moipon sa klase sa Naga National High School.
Samtang ang mga tinun-an nga anaa sa mga non-school evacuation center; Enan Chiong Evacuation, Apo gymnasium, organisahon usab ug padad-an og mga magtutudlo.
Ang mga bakwit nga tinun-an hatagan og mga school supplies gikan sa mga donasyon ug sa Dep-Ed. – IBM (BANAT NEWS)
- Latest
