2 ka motorista nangamatay, ang usa natagak sa pangpang

CEBU, Philippines — Diretso nga namatay ang usa ka motorista human matagak sa lawom nga pangpang ang gisakyan niyang motorsiklo didto sa Barangay Ugis, bukiran nga bahin sa dakbayan sa Danao kaniadtong Sabado sa buntag.

Si PO2 Joseph Aledon sa traffic section sa Danao City Police Station miila sa namatay nga mao si Mario Montes Camacho Jr., usa ka security guard. Nagtuo si PO2 Aledon nga kusog kaayong nagpadagan si Camacho pauli na unta sa ilang panimalay ug wala makakontrolar sa motor hangtud nga nalahos pagkahagbong sa pangpang.

Nakaplagan na lang sa mga lumolupyo ang lawas sa biktima didto ubos sa pangpang nga nagbuy-od ug walay panimuot, ug diha sa tupad ang iyang nakupog nga motorsiklo.

Ang mga doktor mideklarar nga patay na daan ang biktima dihang niabot sa Danao Provincial Hospital.

Samtang patay usab ang 39-anyos nga motorista samtang grabeng naangol ang iyang angkas human sila mabangga sa gikasugat nga trak didto sa Barangay Poblacion, Alegria niadtong Sabado sa buntag.

Ang namatay mao si Arsenio Patriarca, 39, minyo, lumolupyo sa Sitio Looc, Barangay Legaspi, Alegria, samtang ang naangol mao si Narciso Bariaga, 39, minyo, taga Barangay Kaipilan, Pinamungajan.

Si SPO4 Mario Paler sa Alegria Police station mitug-an nga paingon sa norte ang direksyon sa motorsiklo, samtang ang gikabangga nila nga Mitsubishi canter truck (AAT 5260) gimaneho ni Nelson Taray, 35, taga San Nicolas, Dakbayan sa Sugbo.

Nagsunod ang mga biktima sa usa ka pasaheroang bus ug sa dihang kini mihunong, mi-overtake si Patriarca apan nadam-ag sila sa sakyanan nga ilang gikasugat.

Nangalagpot sila sa karsada ug nabuwag sa motorsiklo nga ilang gisakyan. Sa pakisusi sa kapolisan, gikan diay nga namiyesta ang managhigala ug nakainom.

Matud pa nga ang kabanayan sa namatay wala nay tinguha nga mopasaka og kaso, apan mihangyo nga tabangan sila paghipos sa biktima. (BANAT NEWS)