Makina sa LTO paghimo’g lisensiya guba ba gyud?

CEBU, Philippines - Gisusi sa mga stakeholders sa Land Transportation Office sa Dakbayan sa Mandaue kung tinuod ba nga guba ang makina nga moimprinta sa driver’s license.

Kini human gipahibawo ni LTO-7 acting chief Alita Pulga nga guba ang optical machine reader (OMR) sa Mandaue City Licensing Center hinungdan nga wala sila modawat og aplikante alang sa driver’s license sukad niadtong Hunyo sa niaging tuig.

Usa ka suwat ang gipirmahan sa mga nanag-iya og klinika, drug test center, smoke emission test center, insurance provider ug mga drayber ang gipadangat ngadto sa buhatan ni LTO chief Edgar Galvante.

Buot sab masayran sa mga stakeholders kung gipahibawo ba ni Pulga ug kung nihangyo ba kini nga ipaayo ang OMR.

Usa sa mga nipirma nga si Dr. Danilo Dionson, accredited physician sa LTO, nagkanayon nga daw gisilutan ang mga kliyente sa LTO-Mandaue. (BANAT NEWS)