Gikan nanihapon, nagsusi sa manok igtatari gipusil patay

CEBU, Philippines - Gipusil patay ang usa ka 49-anyos nga amahan sa wala mailhing lalaki sulod sa abandonadong balay sa Deca Homes 3, Ibabao, Basak, Dakbayan sa Lapu-Lapu sa niaging Miyerkules sa gabii.

Si Veneralio Dumogho nakit-an mismo sa anak ug asawa nga wala na’y kinabuhi pasado alas 8 sa gabii, matud ni PO2 Marven Saraum, imbestigador sa Lapu-Lapu City Police Office-Homicide Section.

Base sa imbestigasyon nga gikan nanihapon si Dumogho kuyog sa asawa nga si Emilida alas 7 sa gabii ug human niini, nilakaw ang biktima aron  tan-awon ang iyang mga manok pangsabong.

Duha ka buto gikan sa pusil ang nadunggan niadto’ng gabhiona ug pipila ka minutos, usa ka silingan ang nipahibawo sa anak nga si Khem nga gipusil sa wala mailhi’ng lalaki ang amahan.

Nakaangkon og samad pinusilan ang biktima sa agtang, tuong bahin sa mata ug tuong bahin sa abaga.

Matud ni Saraum nga usa ka deformed bullet ang nakuha nila sa crime scene ug gituohang gikan sa .38 caliber revolver. (BANAT NEWS)