Call center company nanira, mga kawani mireklamo sa DOLE

CEBU, Philippines – Dul-an sa napulo ka mga kawani sa usa ka call center company sa dakbayan sa Sugbo ang nidangop sa buhatan sa Department of Labor and Employment(DOLE)-7 aron mangayo og tabang human kalit lang nanirado ang ilang gitrabahoan nga kompaniya nga walay abiso kanila.

Mismo si DOLE-7 Regional Director Exequiel Sarcauga ang miatubang sa mga kawani kagahapon sa buntag aron paminawon ang problema niini labot sa ilang kompanya.

Usa sa empleyado nga miadto sa DOLE-7 mao si Gerald Escobido, 28-anyos, kapin sa duha ka tuig na nga nagtrabaho sa Eziconnect company ug miasoy nga nakugang na lang sila dihang gipahibalo niadtong Lunes nga sirado na ilang kompanya ug wala na silay trabaho.

Gibutyag ni Escobido nang-resign na ang tanan lakip na ang admin, human resource ug ang manager ug sila nalang ang nahabilin sa maong kompaniya.

Hinuon, matud niini, nadawat nila ilang last pay niadtong Disyembre 16 ug ang ilang 13th month pay apan wala pa'y klaro kun makadawat ba sila sa ilang separation pay.

Dugang niya sa wala pa sila mamalhin sa ilang bag-o nga opisina gipasaligan sila nga makapadayon sila sa ilang trabaho apan dihang nabalhin na duna na sila'y nadunggan nga isyu kabahin sa ilang kompaniya.

Matud pa 25 ngadto sa 30 ka  empleyado sa maong kompaniya, 10 niini ang nawad-an og trabaho samtang ang uban gi-absorb sa ilang kliyente ug pabilin nga aduna'y trabaho.

Sa phone interview sa Banat News sa kanhi business support manager sa maong kompaniya nga si Paul Michael Briones kini nagkanayon nga Nobiyembre 30 pa dihang ni-resign siya ug epektibo kini Disyembre 1 ning tuiga.

Si Briones gipatawag sa DOLE-7 karong adlawa aron moatubang kang Sarcauga ug sa mga apektadong mga kawani.

Si Jose “Joe” Tumungha sa Alliance of Progressive Labor (APL) kinsa niuban sa mga kawani sa buhatan sa DOLE-7 miasoy nga miduol kanila ang maong mga apektadong empleyado hinungdan ilaha kining gikuyogan sa ahensiya. – /EIM) (BANAT NEWS)