Winston niawhag P85M ipagamit sa hospital

CEBU, Philippines – Nanawagan si One Cebu gubernatorial candidate Winston Garcia sa Kapitolyo nga gastohon sa pagkuha og tarung nga mga doktor ang P85 milyones nga gigahin alang sa pagkuha og consultants sa mga proyekto.

Kini human laing namatay sa district hospital nga gidumala sa Kapitolyo tungod sa pagpa-inom og expired na nga tambal.

Si Garcia nasubo sa sunod-sunod nga insidente nga pagkamatay sa mga pasyente sa mga district hospitals sa lungsod sa Minglanilla, Barili ug Tuburan.

Gitumbok ni Garcia ang resulta sa pakisusi nga ang hinungdan sa pagkamatay mao ang pagdinanghag sa mga doktor ug medical staff nga nag-atiman.

Matud ni Garcia nga ang tinguha ni Gob. Hilario Davide III nga mokuha og consultants alang sa duha ka proyekto usa ka pag-usik-usik sa pundo nga magamit unta sa pagpalambo sa serbisyo sa mga tambalanan.

Si Garcia nisaad nga kung mahimo siya’ng gobernador sunod tuig nga eleksiyon, iya’ng prayoridad ang paghatag sa de kalidad apan libre nga serbisyo sa tambalanan. (Gregg M. Rubio)(BANAT NEWS)