Mga lote sa OPPRA iya na sa mga nagpuyo

CEBU, Philippines – Hingpit na nga napanag-iya sa mga residenteng nagpuyo sa lote nga iya sa Kapitolyo nga nahimutang sa Barangay Kalunasan, Dakbayan sa Sugbo ang luna nga ilang giukopar.

Kagahapon si Gob. Hilario Davide, III mipirma sa Deeds of Absolute Sale sa maong lote.

Ang mga beneficiary sa lote gilangkuban sa mga heredero ni Ramon Adarna nga miokupar sa 120 square meters, mga heredero ni Ramon Bacayo nga nag-okupar sa 115 square meters, Erlinda Bulante nga nag-okupar sa 115 square meters, mga heredero ni Desiderio Canedo nga miokupar sa 120 square meters, Antonio Cornejo miokupar sa 129 square meters.

Lakip sa nahatagan niini mao sila si Sulpicia Dayanan miokupar sa 116 square meters, Loreto Garciano miokupar sa 130 square meters, Vitaliano Gorgonio miokupar sa 120 square meters, Gabriel Jadrque, Jr. miokupar sa 120 square meters, mga heredero ni Angela Ricamora nga miokupar sa 121 square meters, Rosalinda Tejam nga miokupar sa 115 square meters ug mga heredero ni Ceferino Villanueva nga miokupar sa 143 square meters.

Ang maong mga benepisyaryo mga miyembro sa Old Philippine Railway Residents Association (OPPRA) Inc.

Ang hunta probinsiyal niining ulahi lang mihatag og pagtugot kang Davide sa paglagda sa Deed of Absolute Sale human nga ang maong mga benepisyaryo nakapakita og mga dokumento nga nahuman na sila og bayad sa maong luna ngadto sa Kapitolyo sa panahon pa ni kanhi gob. Pablo Garcia. Ang maong mga residente mihangop kang Davide tungod kay sa dugay na nga panahon nga ilang pagpaabot nahimoan na og kamatuoran ang pag-angkon nila sa maong mga luna. – /EIM) (BANAT NEWS)