Mandaue City mopasigarbo sa ilang lokal nga produkto

CEBU, Philippines - Ang pagpasigarbo sa kaugalingong produkto nga gigama sa mga pabrika sa Dakbayan sa Mandaue maoy sentro sa mga kalihokan sa cooperative month nga gisalmotan sa 24  ka nagkahiusang kooperatiba sa dakbayan.

Ang 24 ka kooperatiba misalmot sa pagbukas sa mga kalihokan sa maong kasaulogan pulos sakop sa Mandaue City Cooperative Development Council.

Kini gisugdan pinaagi sa Santos nga Misa sa National Shrine of Saint Joseph sayo sa buntag ug gisunod gilayon ang foot parade ug ingon man ang ceremonial program. Si Mayor Jonas Cortes nga maoy chairperson sa  MCCDC  ug  Bise Mayor Glenn Bercede maoy nangulo sa gihimo nga  “cutting of ribbon” sa gipahigayon usab nga  Cooperative Trade Fair nga gipahimutang usab sa  City Hall plaza.

Si Cipriana Mumar nga maoy assistant regional director   sa Cebu Cooperative Development Authority (CDA)  Ma. Fe Palaboc, nga maoy property development specialist ang miabag usab  sa cutting of  ribbon nga gipahigayon.

Dugang sa mitambong sa pagbukas sa kalihokan sila si CDA, Macario Quevedo, CEO, People’s Cooperative, councilor Beethoven Andaya, chair, committee on cooperatives ug  ingon man si Atty. Ernesto Maringuran nga maoy Mandaue City Cooperative Development Officer. “Cooperatives play a significant role in our effort to alleviate poverty… and in the attainment of our vision of making the city as the, “primary source of high quality manufactured consumer products by 2020,” ni Mayor Cortes pa sa iyang pamahayag sa programa nga gihimo sa Mandaue City Sports and Cultural Complex.

Si Nuvelyn Batiller nga maoy coordinator  sa  MCCDO  miingon nga buksan na usab ang “I am Mandaue” Shop sa Oktubre 25  sa ikaduhang andana sa Parkmall  diin mga ginama nga produkto sa Mandaue ang iladlad niini. – /EIM) (BANAT NEWS)