Public hearing sa hybrid bus karong Oktubre 16
CEBU, Philippines - Gibutyag sa Land Transportation Franchising and Regulatory Board (LTFRB)-7 nga hatagan og higayon nga mosang-at sa ilang pagsupak ang mga operators sa 77 ka hybrid buses nga mobiyahe gikan sa dakbayan sa Talisay paingon sa Mactan-Cebu International Airport (MCIA) anha agi sa South Road Properties.
Adunay umaabot nga public hearing karong Oktubre 16 kalabot niini aron mahatagan og kahigayonan ang publiko, apil na ang transport operators sa Sugbo nga makapadayag sa ilang hunahuna kabahin sa maong plano.
Matud ni Reynaldo Elnar, regional director sa LTFRB-7 ang mga makuha nilang reaksyon ug mga pamahayag sa maong public hearing ipadala kini didto sa kaulohan aron tun-an una pa mopagawas og desisyon.
Siya midugang nga sa pagkakaron, gitugotan sa Department of Transportation and Communication (DOTC) ang 77 ka mga hybrid bus sa maong developmental routes (Talisay-MCIA via SRP).
Apan sa 77 ka hybrid bus, 22 lang niini ang mobiyahe agi sa SRP, Cebu City Hall, SM City – North Reclamation Area ug North Bus Terminal ug P40 ang plete. Samtang ang laing 11 ka bus mobiyahe og Talisay-SM Seaside City nga P25 ang plete.
Ang laing walo ka unit mobiyahe sa Talisay City paingon Mactan nga moagi og Cebu City Hall ug North Bus Terminal diin P75 ang plete.
Samtang ang 36 ka units mobiyahe gikan sa Mandaue City ug SM Seaside City ug P25 ang plete.
Usa sa proponent sa High Quality Public Transport System (HQPTS) si Atty. Rafael Yap miklaro nga di kakompetensya sa bisan unsang rota ang hybrid bus kay way rota nga nagdagan sa maong developmental route.(Decemay P. Padilla/EIM)(BANAT NEWS)
- Latest
