City Hall patabangon sa maestro nga naligsan

CEBU, Philippines – Giawhag sa principal sa Banilad Elementary School ang kagamhanan sa dakbayan sa Sugbo sa pagtabang sa magtutudlo kinsa wala pa’y panimuot human naligsi sa sakyanan ni Konsehal Richie Osmeña.

Matud ni Lily Ann Go nga maglisud ang pamilya ni Junrey Sanchez sa mga bayranan sa hospital nga giingong moabot na sa P100 mil.

Si Go nibutyag nga si Osmeña nibisita na sa tambalanan niadto’ng Sabado ug nisaad nga motabang sa pamilya sa biktima.

Ang driver ni Osmeña nga si Ronnie Badajos ang nibisita na usab sa tambalanan nipahibawo nga andam kini motabang.

Si Go niadto na sa ila’ng division office ug nipadala og suwat sa ila’ng superintendent aron makapagawas kini og memorandum alang sa monetary voluntary contribution sa ila’ng kaubanan.

Si Sanchez nagtudlo sa Grade 4 sa subject nga Edukasyong Pantahan at Pangkabuhayan.

Nahitabo ang insidente niadtong Biyernes diin ang tunghaan adunay kalihukan sa Teacher’s Night.

Matud ni Go nga pasado alas 7 sa gabii nahibaw-an nalang nga naligsan ang magtutudlo diha’ng giduol siya ug gipahibawo nga manawag og ambulansiya aron dad-on sa ospital ang biktima.

Giingong paingon unta molabang sa dalan si Sanchez aron pagtambong sa Santos nga Misa atbang sa ila’ng tunghaan dihang naligsan.

Sigun ni Go nga sa niagi’ng adlaw diha’ng iya’ng gibisita si Sanchez anaa na kini sa recovery room apan dili pa makabuka sa iya’ng mata ug unconscious pa.

Wala pa usab masayud si Go sa kadaut nga nahiaguman sa magtutudlo sanglit wala pa niya maestorya ang doktor nga nag-atiman ni Sanchez. – /GMR) (BANAT NEWS)