Dugang proyekto, serbisyo pangindahay sa mga mayor

CEBU, Philippines – Nangandoy ang mga mayor sa kalungsuran nga malakip sa State of the Province Address ni Gobernador Hilario Davide III ang pagpalambo sa serbisyo sa panglawas ug sa mga proyekto sa inprastraktura.

Si Asturias Mayor Allan Adlawan nga sakop sa One Cebu Party nagkanayun nga iya’ng naobserbahan nga si Davide naningkamot nga mapauswag ang probinsiya.

Si Adlawan nanghinaut nga mapauswag pa ang serbisyo sa panglawas sa katawhan sa kalungsuran.

Apan iya’ng gipasabot nga dili lang sila magdahum pag-ayo tungod kay una’ng termino pa ni Davide ug padayun pa kini’ng nagkat-on sa pagpadagan sa probinsiya. Si Medellin Mayor Ricky Ramirez, sakop sa One Cebu Party, naglaum usab nga ilakip ni Davide sa iya’ng SOPA ang pagpadayun sa pagpaayo sa mga provincial roads nga iya’ng gisaad.

Si Ramirez nanghinaut nga hatagan usab og pagtagad ang mga district hospitals.

Si Ronda Mayor Mariano Blanco nga kaalyado na sa Liberal Party nagkanayun nga kontento siya sa pagdumala ni Davide sa probinsiya.

Si Bokal Sun Shimura nga kaalyado usab sa One Cebu Party nagkanayun nga higayun na sa gobernador karon nga mapahibawo ang nahimo sa probinsiya aron mawagtang ang mga katahap nga wala’y nahimo’ng kaayuhan ang administrasyon ni Davide.

Hinuon matud ni Shimura nga ang administrasyon karon wala’y gipili tungod kay bisan og dili kaalyado nakadawat gihapon og tabang.

Si Shimura nisugyot nga dili ideretso sa paghatag sa kalungsuran ug kabarangayan ang mga proyekto aron mahibaw-an sa katawhan nga ang probinsiya duna kini nahimo. – /GMR) (BANAT NEWS)