Cortes makigkita ni Rama bahin sa trapiko

CEBU, Philippines –  Makigtagbo si Mandaue City Mayor Jonas  Cortes kang Mayor Michael  Rama aron ilang kapangitaan og solusyon ang nasinati karong problema sa trapiko sa duha ka dakbayan nga epekto sa pagsirado sa dalan S. Osmeña sa reclamation area sa habig sa Cebu City.

Matud pa ni Cortes nga si Cebu City Vice Mayor Edgardo Labella maoy nagtakda sa maong panagtagbo dihang iya kining gihangyo niadtong miaging gabii.

Gipasabot ni Cortes nga naghuot ang mga dalan sa Mandaue ilabi na sa dalan M. Logarta sa Barangay Subangdaku epekto kini sa pagsirado sa S.Osmeña Blvd. sa Cebu City nga lutsanan sa mga sakyanan gikan sa Mandaue.

Gitataw niya nga niadtong Pebrero 27 niining tuiga naghimo na unta og coordination meeting nga gitambongan sa mga opisyal sa Traffic Enforcement Agency of Mandaue (TEAM) ug City Traffic  Operation and Management (CITOM) isip kabahin sa pagpangandam sa pagsirado sa S. Osmeña.

Ang maong dalan gipaubos sa rehabilitasyon alang sa pagpangandam sa nagsingabot nga Asia Pacific Economic Cooperation (APEC).

Buot isugyot ni Cortes nga himuong two lanes ang S. Osmeña aron ang mga sakyanan nga gikan sa Cebu City makalahos sa dalan  Ouano Avenue sa Mandaue. – /EIM) (BANAT NEWS)