Lalaki nagpusil patay, kapuyo naangol

CEBU, Philippines - Nalandig sa tambalanan ang 28-anyos nga babaye human naigo sa bala gikan sa iyang kapuyo nga naghikog patay sulod sa ilang gipuy-an sa sitio Pantao, Carnaza, lungsod sa Daanbantayan niadtong nakalabay nga hapon.  Ang naghikog patay naila nga si Raymond Tora, 31, ug ang naangin sa iyang paghikog naila nga si Flordy Arriesgado, 28, nga nagpasuso sa iyang anak atol sa hitabo.

Matud ni PO3 Alex Ricarte, desk officer sa Daanbantayan Police, nga si Tora nagkig-inom pa sa iyang duha ka silingan doul sa ilang balay.

Dihang nisulod sa balay si Tora nadungog na lang sa iyang mga amigo nga naglalis ug ang kapuyo ug nalitok nga  “para mausa ang problema” ug gisundan sa  buto sa armas. Sa pagsusi sa sulod sa balay, nagbuy-od na sa sawog ang lalaki nga ang kamot dunay gihawiran nga .38 revolver ug ang babaye dunay igo sa kilid sa hawak. Dead on the spot si Tora kinsa may samad pinusilan sa ulo samtang nalandig sa tambalanan si Arriesgado. (Jojo C. Ugdol/GMR)(BANAT NEWS)