Usa sa “suspek” pagpatay sa duha ka polis mitahan

CEBU, Philippines - Gipaubos na sa kustodiya sa Moalboal Police Station ang usa ka lalaki nga mitahan sa Fuente Police Station sa Cebu City human nalambigit sa nahitabong pagpamusil patay sa duha ka polis sa maong lungsod.

Ang mitahan sa Fuente Police kuyog ang iyang ig-agaw nga konsehal naila nga si Ezra-el Ocariza, 28, lumad nga taga Poblacion, Alcantara.

Matud pa ni Police Inspector Edgar Labe, hepe sa Moalboal Police  nga nahinabi sa Banat News, si Ocariza mitug-an nga igo lang kini miadto sa lugar kay duna unta kini tuyo sa maong dapit apan sa iyang paglakaw nakadungog siya og sunodsunod nga buto sa armas maong mikaratel siya og dagan.

Sumala pa ni Labe nga mitahan sa kapulisan si Ocariza kay matud pa naapil ang pangalan niini sa mga gitug-an nga didto sa lugar ug gusto niini nga klarohon ang maong impormasyon ug gihimakak nga apil siya sa mipusil sa mga polis.

Apan gipasabot ni Labe nga ila gihapon tanggungon si Ocariza hangtod nga di mahuman ang ilang imbestigasyon.

Gitug-an ‘sab ni Labe nga ang nakuha nga lisensiya sa kapulisan sa crime scene dili kini kang Ocariza.

Napatay sa maong drug bust sila si PO3 Fabio Fernandez ug PO1 Alrasid Jimlani atol sa pag-serve nila sa search warrant batok kang Michael Aquino, si Aquino wa madakpi.

Apan samtang nag-imbentaryo sila sa mga ebidensya, kalit nga gipamusil ang duha ka polis diha sa gawas nga mao untay perimeter security ug nadungog na lang nila ang mipasirit palayo nga usa ka motorsiklo.

Tungod sa nahitabo nakasibat ang upat ka mga tawo nga sila si Phil John Ediza; Rolly Tabanao, pulos taga Poblacion East; ug si Allen Amad, nga taga Tomonoy, ang usa wala pa makuhai sa iyang pangalan dihang nahitabo ang pagpamusil ug nakaikyas usab.

Nakuha sa drug den ang 19 ka gagmay nga pakete sa drugas nga nasakmit sa kapulisan ug duna pa’y usa ka .45 pistol ug 357 revolver ang nakuha sa mga operatiba, samtang wala ma-recover ang armas ni Fernandez.

Ang kanhi undersecretary sa Dangerous Drugs Board (DDB) Atty. Clarence Paul Oaminal miklaro nga mahimong adto na imbentaryohon ang mga nakuhang ebidensiya gikan sa anti-drug operation sa labing duol nga presinto sa kapolisan kun peligro ang lugar.

Si Oaminal nga executive officer sa City Anti-Drug Abuse Council (CADAC) mitug-an nga kinahanglang i-secure una sa mga polis ang ilang mga kaugalingon una pa sila mohimo sa imbentaryo sa mga ebidensiya. (BANAT NEWS)