Convenience store sa Banawa gitulis

CEBU, Philippines- Laing convenience store sa dakbayan sa Sugbo ang gitulis may dalan M. Velez, Banawa, Guadalupe alas 3 pasado sa niaging kadlawon.

Ang Routestop convenience store ang gitulis sa duha ka tulisan diin nakuha ang P23,000 ug tulo ka cellphones nga mikantidad og kapin P11 mil.

Wala na’y nahimo ang cashier nga si Honelyn Arrogante, 22, ug ang babaye nga guwardiya nga si Jonalyn Guimary, 31, dihang sila gisulod sa duha ka tulisan nga pulos armado ug nagsuot og kawo.

Sama sa ubang pagpanulis, gikuha sab sa mga tulisan ang .38 revolver nga armas sa guwardiya dayon sibat sakay sa motorsiklo.

Sa maong hitabo, giangkon sa hepe sa City Intelligence Branch, Supt. Romeo Santander, nga nainsulto na sila sa gibuhat sa mga tulisan nga sunod-sunod nga pagpanulis. “To tell you honestly insulto gyud sa amoa like sa among part, hoping lang sa positive result as days to come,” sigun pa ni Santander. Usa sa plano karon sa kapolisan ang pagpakatap og dugang mga pulis sa dakbayan ilabina sa mga establesemento nga dali nga tulison.

Nagduda si Santander nga ang mga mihimo sa pagpanulis sa 7-Eleven mao ra sab ang mitulis sa Routestop human nitukma ang panagway sa mga tulisan base sa pasiunang imbestigasyon sa CIB.

Wala na hinuon gibutyag ni Santander kung unsa pa ang ilang mga plano batok sa mga tulisan apan kini masaligon nga may adlaw ra gihapon ang mga polis sa paggukod sa mga tulisan. (BANAT NEWS)