Dugang 2 ka police station gisugyot

CEBU, Philippines - Duha ka police station ang gitinguha nga tukoron sa bukiran nga barangay sa dakbayan sa Sugbo aron mapalambo pa ang kampanya batok sa mga krimen, ilabi na ang pagpamaligya og ilegal nga drugas.

Matud ni Cebu City Police Office (CCPO) director Noli Romana nga gusto niya nga ang usa  ka police station adto ibutang sa Barangay Guba, duol ra sa Barangay Cambinocot ug Pulangbato aron matutokan ang problema sa ilegal nga drugas sa mao nga mga dapit.

Si Romana miingon nga sutaon pa nila kun asa ang tukma nga dapit sa kabukiran nga maayo’ng butangan og police station. Gawas sa police station, gusto usab si Romana nga magbutang og police detachment sa bukid.

Giangkon ni Romana nga ang pagmugna og bag-ong police station magkinahanglan og dugang polis nga madistino. Pagka karon, ang dakbayan sa Sugbo aduna la’y 11 ka police station ug pipila ka special units.

Matud ni Romana nga mahimo’ng magtunga sa gasto ang City Hall ug ang kapolisan  pagmugna og building alang sa bag-ong police station nga gibana-bana nga mokantidad og P3 milyones.

Naglaom si Romana nga adunay mga tawo sa Barangay Guba nga modonar og labing minos 400 metro-kwadrado nga luna aron katukoran og police station.

Apan si Mayor Michael Rama misugyot nga ang bag-ong police station anha tukora diha sa Barangay Lahug kilid sa barangay hall ug ang iyang teritoryo maglakip sa kabukiran.  (BANAT NEWS)