CESET mihulgang ikiha ang mga opisyal sa City Health
CEBU, Philippines - Mihulga ang hepe sa Cebu Environmental Sanitation and Enforcement Team (CESET) nga pasakaan og kaso ang kadagkuan sa Cebu City Health Department tungod kay wala gihapon gilahilahi ang mga basura sa maong departamento.
Atol sa inspeksiyon sa mga kawani sa CESET, nasuta nga gisagol gihapon ang mga peligro nga basura sama sa mga dagom sa ubang mga basura.
Sa miagi nga buwan naisyuhan na ang CCHD og citation ticket tungod niini ug anang higayona gipahimangnoan sila nga lain-lainon ang peligro, malata ug di malata nga basura, apan wala nila kini buhata.
Apan si Dr. Daisy Villa, hepe sa CCHD miingon nga wala siya kabalo sa maong isyu ug kinahanglan pa niya kini klaruhon, midugang usab siya nga bag-o ang janitorial agency nila karun sa departamento.
Samtang mireklamo si Grace Luardo, hepe sa CESET dugay kaayo ang pag-notaryo sa City Legal Office sa affidavit sa apprehending officers ug peligrong mabahaw ang mga kaso kay maabtan kini sa duha ka bulang tagal alang sa mga light offense subay sa Article 90 of the Revised Penal Code.
Kun molapas niini, dili na makombikto ang usa ka nakalapas sa balaod. (BANAT NEWS)
- Latest
