Andam nga panakpon ang nalambigit sa pork barrel scam — CIDG Chief

CEBU, Philippines - Natagbaw ug gipasigarbo sa director sa Criminal Investigation and Detection Group ang hepe sa CIDG-7 sa mga nahimo niini.

Mibisita sa buhatan sa CIDG 7 kagahapong adlawa si Police Director Benjamin Magalong ang labaw sa CIDG. Gipresentar kaniya ang tanang mga na-recover nga mga paltik nga mga armas nga nasakmit sa mga operasyon sa CIDG 7, kadaghanan niini gikan sa siyudad sa Danao.

Miabot sa 95 ka mga armas ang ilang nakuha sa 33 ka mga operasyon nga ilang gilusad, nga naglambigit sa 45 ka mga high powered fire arms, 23 ka mga low powered ug 27 ka mga home made fire arms. Matud pa ni Magalong kinahanglang maghiusa ang mamuhatay og armas sa Danao ug angay tabangan sa ilang local nga kagamhanan aron pangitaan sila og alternatibong panginabuhian.

Supak hinuon si Magalong nga i-legalized ang pagpanghimo sa Danao og mga armas tungod kay dili safe ang maong mga armas pagkahimo. Nagpasalamat sab si Police Senior Superintendent Ritchie Posadas ang hepe sa CIDG 7 nga luyo sa ilang pagpaningkamot, nakita diay kini sa ilang mga labaw.

Samtang  sa laing bahin, andam ang CIDG nga mosikop sa mga nalambigit sa pork barrel scam sa mga lokal nga opisyal dinhi sa probinsya sa Sugbo kung aduna na’y order nga sila arestohon.

Matud pa ni Magalong nga ilang trabaho ang pagpatuman sa balaod ug andam sila nga mosikop sa bisan kinsa nga nalambigit sa maong anomaliya.

Nasayran nga una nang migawas sa mga report nga aduna’y pipila ka mga lokal nga opisyal dinhi sa Sugbo ang nalambigit sa multi-billion peso pork barrel scam nga gipaagi sa mga peke nga non-governmental organizations ni Janet Lim Napoles

Apil sab nga iyang gipasalig nga sila ang manguna’y sa pagsikop sa mga miyembro sa Highway Patrol Group 7 nga nalambigit sa pagpatay ni Atty. Noel Archival bisan ila kining kauban nga polis.  (BANAT NEWS)