Libreng syringes sa mga adik gipahunong sa cosap

CEBU, Philippines - Daghan ang wala masayod nga ang mga drug adik nga mogamit og mga injectable drugs gipanghatagan og libre nga syringe sa kagamhanan pinaagi sa Department of Health (DOH).

Dinhi sa dakbayan sa Sugbo, ang mga adik nga mogamit og injectable drugs moadto ra sa Cebu City Health department diin anaa nagbase ang usa ka Non-Government Organization (NGO) nga maoy gigamit sa DOH sa pagpanghatag sa mga syringe.

Apan ang mao nga kalihukan gipahunong sa kadagkoan sa City Anti-Drug Abuse Council (CADAC) dinhi sa dakbayan sa Sugbo kay gihulagway nila nga ingon sa gidasig hinuon sa mga opisyal sa DOH ang mga adik sa pagpadayon sa ilang bisyo.

Matud ni Dr. Alice Utlang, pangulo sa Cebu City Office for Substance-Abuse Prevention (COSAP) ug sakop sa CADAC, nga usa ka semana na nga ilang gipaundang ang pagpanghatag sa mao nga mga syringe ngadto sa mga adik. Ang tumong sa DOH nga mapugngan nga modaghan ang sakit nga Human Immunodeficiency Virus (HIV) tungod sa pagbanus-banos og mga syringe sa mga adik.

Nadungog na nga diha sa Barangay Kamagayan adunay usa ka balay nga ang mga adik og injectable drugs mopalusot ra sa ilang bukton ngadto sa lungag human makahatag sa bayad ug ang tawo nga tua sa sulod motuslok dayon sa bukton sa adik.

Ang pag-injection og Nubain, usa ka matang sa pain killer, dugay na kaayo nga gihimo sa mga adik ug maoy rason nga ang dakbayan adunay ordinansa nga ang mao nga matang sa pain reliever dili na ipabaligya kun walay resita sa doktor. (BANAT NEWS)