Asawa’g drug pushers makadawat og cash assistance

CEBU, Philippines - Giangkon ni Konsehal Gerardo Carillo nga ang mga asawa sa drug pushers nga nabilanggo diha sa Cebu City Jail apil nga makadawat og hinabang-salapi gikan sa kagamhanan sa dakbayan kun aprobahan ang iyang gisugyot nga Solo Parents Ordinance.

Base sa gisugyot nga ordinansahon ni Carillo nga pagatukion pagbalik sa City Council alang sa final deliberation karong Miyerkules mao nga isipon nga Solo Parent ang mga asawa ug bisan ang bana kun ang ilang mga kapares atua sa bilanggoan ug sila ang nag-atiman sa ilang mga anak.

Gipasabot ni Carillo nga tumong sa iyang gisugyot nga ordinansahon nga katabangan ang mga anak sa mga piniriso. Alang ka’ng Carillo nga gamay ra kaayo ang P5 mil nga hinabang-salapi nga ihatag sa tibuok tuig.

Gituohan hinoon nga modagsang ang mga tawo nga mag-ambahan paingon sa City Hall aron magparehestro kun aprobahan na ang ordinansa aron sila makadawat og P5 mil ang tuig.

Pagka karon, kapin lang sa usa ka libo ka babaye nga miangkon nga sila “solo parent” kay gipaangkan ug ang uban biyuda, nga padayong nag-atiman sa ilang mga anak. Gipahulam sila og salapi sa dakbayan aron magamit nila sa pagpuhonan og negosyo. (BANAT NEWS)