19 ka barangay sa Lapu-Lapu gihugpaan og illegal drugs

CEBU, Philippines - Ilegal nga drugas mikatap sa 19 ka barangay sa dakbayan sa Lapu-Lapu  sumala pa sa Lapu-Lapu City Police Office.

Matud pa ni  Senior Inspector Rogelio Pineda Jr., hepe sa City Intelligence Branch sa LCPO , ang maong 19 ka barangay gihugpaan karon sa illegal drugs, wala hinuon pangalani sa opisyal kung unsa nga mga barangay.

Apan miinsister siya nga dili pa kaayo kini “rampant” ug wala pay barangay nga ilang nasuta nga naghitak o grabe gyud ang kalihukan sa ilegal nga drugas.

Ang kapolisan nakigsandurot sa mga opisyal sa matag barangay aron ilang masabtan sa ilang katungdanan ug tudloan sila sa mga pamaagi pagtabang sa kapolisan. Ang nagsunod nga pagkasikop sa mga drug pushers sa dakbayan resulta sa impormasyon gikan sa mga texters.

Sud ning bulana miabot na sa pito ka major operations ang gihimo sa  LCPO ug 19 na ka tawo ang nasikop ug napasakaan og kaso. (BANAT NEWS)