Puya gibilin sa dagkotanan sa kandila sa birhen sa regla

CEBU, Philippines - Usa ka puya ang gibilin sa dagkotanan og kandila sud sa simbahan sa Berhin sa Regla Shrine sa barangay Poblacion dakbayan sa Lapu-Lapu kagahapon sa buntag.

Sa pasiunang imbestigasyon ni PO3 Lydo Pinos, nasayran nga usa sa mga caretaker sa maong simbahan nga si Mariano Dico, 54, maoy nakakita sa usa ka plastic bag sa usa ka department store gibilin sud sa dagkotanan og kandila.

Nagtoo si Dico nga sagbot lamang nga gibilin sa maong plastic bag apan sa pagsusi niya niini puya diay ang sulod niini hinungdan nga iya kining gitaho ngadto sa security guard on duty nga si Moises Dungog.

Si Dungog maoy mitaho sa mga sakop sa Crime Against Persons Desk apan wala na diha ang inahan sa bata o ang mga tawong mibilin niini.

Matud pa ni Pinos usa ka babaye ang puya nga gibanabana nga unom ngadto sa pito ka bulan ug gituohang kaadlawon  pa kini gibilin.

Gisusi karon sa kapolisan ang footage sa closed-circuit television (CCTV) camera palibot sa simbahan ug sa dapit diin nakaplagan ang plastic bag nga gisudlan sa bata.

Ang maong CCTV camera gi-operate kini sa kaparian sa maong simbahan ug sa ilang pakighinabi sa mga personnel sa simbahan naghuwat pa kini sa pagtugot gikan sa kura paruko nga maila ang inahan sa bata.(/EIM)(BANAT NEWS)