Duha ka drug pushers gisikop sa Mandaue

CEBU, Philippines - Nasakmit sa mga polis sa Mandaue ang pinakete’ng shabu gikan sa duha ka gikatahapang drug pushers nga ilang nadakpan sa buy bust operation sa managkalahing dapit ug oras kaniadtong Huwebes sa gabii.

Ang mga nadakpan mao sila si Wilbert Muzares, alyas Itsoy, 37, taga Sitio Ampalaya, Barangay Cambaro ug Giovanie Jocotmaya, alyas Nanie, 22, taga Purok Mangga, Barangay Umapad, Dakbayan sa Mandaue.

Si SPO2 Juan Calamba, sakop sa Presinto 5 sa Mandaue City Police Office (MCPO), miingon nga si Muzares unang nasakmitan og usa ka pakete’ng shabu nga iyang gibaligya ug dugang upat ka pakete ang nasakmit pagrekisa sa iyang bulsa.

Matud pa ni SPO2 Calamba nga nakadawat sila og mga taho gikan sa usa ka concern citizen labot sa illegal nga kalihokan ni Muzares nga maoy nakaaghat kanila sa pagpaniid sulod sa pipila ka adlaw.

Dihang ilang nasuta nga positibo ang maong taho nga gipadangat ngadto kanila, sila si PO2 James Villarino ug mga kauban naghimo dayon og buy bust operation.

Si Calamba miingon nga ang ilang police decoy maoy mipalit og shabu gikan sa suspetsado ginamit ang P200 nga mark money ug dihang iyang gidawat ang drug pusher ila dayon nga gisikop.

Human madakpi, ilang girikisa ang mga bulsa sa karsones ug nakuha pa gayud ang upat ka pakete nga gituohang shabu.

Ang laing suspetsado nga si Giovannie Jocotmaya nadakpan sa kapolisan human adunay mitug-an nga ang mga nagpundok nga mga batan-ong lalaki sa U.N. Avenue sa Barangay Umapad maoy manulis sa pasahero sa PUJ nga moagi sa maong dapit.

Si Inspector Antonio Cervantes ug mga kaubang polis gikan sa Presinto 3 miadto dayon sa mao nga lugar apan naglumba og dagan ang mga batan-on hinungdan nga ilang gipanggukod hangtod nga nadakpan si Jocotmaya.

Sa pagrikisa sa kapolisan ni Jocotmaya ilang nasakmit ang duha ka paketeng shabu, duha ka aluminum tin foil nga gamiton sa mga mohingos og shabu. (/RUB) (BANAT NEWS)