Donasyon alang sa Yolanda survivors gihatag sa RAFI ngadto sa taga Lorega

CEBU, Philippines - Ang Ramon Aboitiz Foundation Inc. (RAFI) ug ilang mga donors mi-donate og gamit alang sa singko mil ka mga tawo nga nabiktima sunog diha sa barangay Lorega-San Miguel.

Ang RAFI pinaagi sa pagtugot gikan sa donor nga si Rachell Lopingco, Filipino-American Council of Greater Chicago, ug Sponsor Philippines, mi-divert sa mga donasyon nga alang unta sa mga survivors sa super typhoon Yolanda survivors ngadto sa mga biktima sa sunog.

Aron mas hapsay ug mapadali ang paghatag sa maong mga hinabang, ang RAFI midonar niini ngadto sa Department of Social Welfare and Services (DSWS) office sa siyudad sa Sugbo.

Ang gihatag nga hinabang naglakip sa 40 ka mga tents ug tarps, 452 packs nga baby diapers (10 ka buok kada pack), 154 packs sa adult diapers ( taglima ka buok kada pack), ug 132 packs nga hygiene packs (dunay sud nga bath soap, shampoo, body wash, tissue, cotton swabs ug lotion).

Sumala pa sa pamahayag nga gipadala sa RAFI sa Banat News, ang maong mga donasyon gikan sa abroad nga alang unta sa Yolanda survivors sanglit sud na sa upat ka buwan nagpadayon gihapon ang ilang relief efforts sa mga survivors sa maong katalagman.

Apan tungod kay nagkinahanglan kaayo karon ang gibanabanang 5,496 ka tawo nga nasunogan sa Lorega giuna nila kini sa subay usab sa ilang katuyoan nga mao ang pagtabang sa mga nanginahanglan.

Si Dr. Ester Concha, DSWS chief, sa maong pamahayag gikatahong nalipay sa donasyon sa RAFI ug sa ubang mga tawo ang mitabang ug mihatag dayon og donasyon.

Gibutyag ni Concha nga hapit na mahurot ang calamity fund sa siyudad niini pa lang unang kwarter ning tuiga ilabi na karon nga nagsige ang mga insidente sa sunog. (BANAT NEWS)