Hilan nga lugar, 2 bata patay

CEBU, Philippines — Patay ang managsuong 12-anyos ug 9 anyos nga mga batang babaye human ang motorsiklo nga ilang gisakyan nadisgrasya sa Sitio Nangka, Barangay Sinsin, siyudad sa Sugbo niadtong Miyerkules pasado alas 9 sa gabii.

Ang nakalas mao si Kathleen Pardillo, 12, ug igsuon niini nga si Yuhan, 9 anyos samtang kritikal ilang inahan nga si Cherry Fe, 34 anyos.

Nalandig sab sa tambalanan ang amahan nga si Herman, 47 anyos ug anak niini nga si Catriona, 5 anyos.

Nasayran nga padulong unta mobilar sa dakbayan sa Talisay ang pamilyang Pardillo. Si Herman ang nagmaneho sa motorsiklo ug angkas niya iyang asawa ug ang tulo nila ka mga anak.

Apan matud ni Police Captain Joel Dela Cerna, commander sa Police Community Precint 12 nga dihang padulhog na ang motorsiklo nawad-an matud pa og brakes ang motorsiklo.

Kini maoy rason nga nabangga ang motorsiklo sa gutter ug nalabay ang usa ka pamilyahan. Dead on the spot ang kinaguwang anak sa magtiayon nga si Kathleen samtang ang 9 anyos nga si Yuhan gidala sa Talisay City District Hospital apan gideklarar kining dead-on-arrival.

Ang amahan ug ang 5 anyos nga anak nini gidala sa Talisay District Hospital ug padayon nga nagpaalim sa angol nga naangkon.

Apan ang asawa ug inahan sa mga bata kay kritikal ang kahimtang sa Vicente Sotto Memorial Medical Center.

"Hilan ug daghan  nadisgrasya diha (Sinsin), dulhugon kaayo...Daghan sad ang mga bata," sigon ni Dela Cerna sa Banat News.

Mimando si Cebu City Police Office Director Colonel Ireneo Dalogdog sa iyang mga tawo nga imbestigaran ang insidente.

Giklaro sa kapulisan nga wala ma report sa ilaha ang nahitabong disgrasya sa bukirang Barangay sa siyudad sa Sugbo.

Nanawagan og tabang ang kabanay sa mga biktima aron mapahiluna og tarong ang mga namatay lakip na sa pagpatambal sa mga naa sa ospital. – BM  BANAT NEWS