Upat ka nangawat sikop, babaye gikuotan sa mall
CEBU, Philippines - Nasikop ang upat ka construction workers human sila giingong nasakpang nangawat og construction materials sa gitrabaho nilang building sa barangay Ibabao, dakbayan sa Mandaue niadtong Sabado sa gabii.
Ang nadakpan mao si Diano Aspacia, 21, taga Ayongon, Negros Oriental, Lauriano Villahermosa Jr., 39, Elmer Potong, 30 nga mga stay-in workers ug Rogelio Tatoy Jr, hingkod ang panuigon nga taga Sitio Bayabas, Barangay Ibabao, Mandaue.
Matud ni PO1 Jesson Estrera nga gipagawas na unta sa mga suspetsado ang mga kabilya nga nagkantidad og P5,000, unom ka metros nga iron bar nga nagkantidad og P3,500 ug duha ka gabas sa puthaw nga wala pa matino ang kantidad.
Nasigpatan ang upat ka suspetsado sa ilang kaubang trabahante nga misulay na unta og pagawas sa mga butang-kinawat nga maoy hinungdan nga sila gidakop ug gitugyan ngadto sa kapolisan ug karon gibalhug pa sa bilanggoan sa Presinto 1.
Sa laing bahin, nawad-an sa iyang salapi ug importanteng butang ang usa ka babaye nga gikuotan sa gikatupad niyang wala hiilhing babaye sulod sa usa ka department store sa Barangay Guizo, dakbayan sa Mandaue kaniadtong Sabado sa gabii.
Si PO1 Estrera miila sa biktima nga si Rowena Villa Carlos, 40, taga Doña Rosario Village, Barangay Basak, dakbayan sa Mandaue.
Matud ni Estrera nga namili ang biktima og iyang mapalit ug namatikdan niya ang wala hiilhing babaye nga nagtapad-tapad kaniya ug nagpakaaron-ingnon nga namili usab sa iyang paliton.
Dihang gidala na ni Villa Carlos ang iyang mga gipili nga paliton ngadto sa kahera nahingangha na lang siya kay nahanaw na ang iyang pitaka nga may sulod nga P2,500 ug ubang mga ID’s ug bank cards. - /BDB (BANAT NEWS)
- Latest
