Yuta sa Sitio San Miguel, apas nga giangkon sa mga Magat, ipakoral na

MANILA, Philippines - Ang pamilya sa mga Magat nga miangkong sila ang tag-iya sa yuta nga gipuy-an sa 157 ka pamilya sa Sitio San Miguel, Barangay Apas nangayo na og permit aron koralon nila ang palibot sa luna.

Si Apas Barangay Konsehal Allan Mahait mitug-an nga ang pamilya’ng Magat miaplay og fencing permit sa mga opisyal sa Barangay Apas aron nga makoral na nila ang gipuy-an sa mao nga mga pamilya.

Ang hukmanan mihatag na og pagtugot nga karong Marso 4 ipahigayon na ang demolisyon sa kabalayan sa mga tawo nga nagpuyo sa yuta sa mga Magat.

Matud ni Mahait nga ang mga opisyal sa Barangay Apas wala mohatag og permit sa pamilya nga Magat tungod sa rason nga aduna pa’y wala maresolbar nga kaso sa hukmanan.

Si Gobernador Hilario Davide III daan na nga mipahibalo nga ang mao nga yuta nga gipuy-an sa nahisgutang mga pamilya dili iya sa Kapitolyo.

Ang mga apektado nga pamilya mipadangat og awhag sa Regional Trial Court (RTC) aron pugngan si Judge Monalila Tecson sa Municipal Trial Court in Cities (MTCC) sa pagpatuman sa iyang kamandoan.

Bisan si Mayor Michael Rama gikataho nga mopirma og petisyon nga ipadangat sa hukmanan aron dili mahinayon ang pag-demolis sa kabalayan sa mga mulopyo. (BANAT NEWS)