Mga balay-patigayon sa Talisay ipasusi kun misweldo ba’g husto

CEBU, Philippines - Ang konseho sa dakbayan sa Talisay miawhag ni Mayor Johnny V. Delos Reyes pagsusi sa mga balay-patigayon sa siyudad aron mahibaw-an kung gituman ba nila ang mga lagda sa Labor Code.

Si Konsehal Aldin Diaz miduso og resolusyon nga kinahanglang ipatuman gayud sa mga agawon ang tukma nga balaod, ilabi na ang paghatag og tukma nga sweldo ngadto sa ilang mga trabahador.

Gikutlo ni Konsehal Diaz ang lagda sa Presidential Decree 422 kon Labor Code sa nasud nga ang kagamhanan moproteher gayud sa mga mamumuo aron dili sila maabusohan sa mga mapahimuslanong agawon.

Ingon sa nagduda ang konsehal nga may mga magpapatigayon sa Talisay nga wala motuman paghatag og sweldo sa ilang mga trabahador, paghatag og tukma nga benipisyo ug uban pa nga alang kanila.

Matud ni Konsehal Diaz nga angayang masusi ang mga balay-patigayon kun mituman ba usab kini sa Article 124 kon “Standards/Criteria for Minimum Wage Fixing” nga gilatid sa Republic Act 6727.

Gikataho nga dunay mga tagdumala og balay-patigayon o kompaniya nga wala g’yud motuman sa balaod ug ang ilang mga kawani sweldohan lang og ubos sa minimum nga sweldo ug wala usab kini klarong benepisyo.

Ang Regional Tripartite Wages and Productivity Board (RTWPB) mimando nga P367 na ang minimum nga sweldo matag adlaw dinhi sa dakbayan sa Sugbo apan ubos og gamay kadtong tua sa mga gagmay’ng dakbayan ug mga lungsod.

Dili pa lang dugay, ang RTWPB mimando na usab nga kadtong mga trabahador nga nagsweldo lang base sa minimum wage pahatagan sila og ‘tag P13 nga Cost of Living Allowance (COLA).

Matud ni Konsehal Diaz nga ang mga kawani angayang hatagan g’yud og tukma nga sweldo ug protehean ang ilang panglawas pinaagi sa paghatag kanila og mga “protective gears.”  (/RUB)(BANAT NEWS)