CCTV footage nagpakita sa “gunman” ni Seno

CEBU, Philippines - Nagtuo ang kapolisan nga masulbad nila og dali ang kamatayon sa anak sa abogado nga gipatay sud sa ilang apartment sa dalan Urgello sa barangay Sambag Dos ning dakbayan sa Sugbu pinaagi sa nakuhang video footage sa  closed circuit television (CCTV) camera. Dunay CCTV footage nga nakuha ang kapolisan gikan sa usa ka bakery duol sa apartment sa biktimang si Richard Seno nga nagpakita sa usa ka lalaking maoy gituohang gunman ug sa motorsiklo nga gisakyan niini.

Si Sr. Insp. Elesandro Quijano ang hepe sa Homicide Section miingon nga duna na silay kopya sa CCTV footage ug naa na kini sa kamot sa ilang technician aron ipa-enhance tungod kay suwaw kaayo ang kuha sa footage.

Miingon si Quijano nga makita sa maong footage nga itom nga motor ang gisakyan sa nagpusil kang Seno.

Si Quijano miingon nga base sa ilang pagtan-aw “daring” sa iyang trabaho ang kriminal. Ang gunman nagpakaaron-ingnong nangita og kaabangang lawak maong gipasud pa kini ni Seno sa ilang apartment ug diha na nahitabo ang pagpusil.

Si Seno ika-lima nga anak ni Atty. Cecilio Seno ang co-founder sa ALU-TUCP ug ang presidente sa estasyon nga DYLA.  (BANAT NEWS)